தீண்டாமை ஒழிப்பில் மகாத்மா காந்தியின் வழியை தீவிரமாக பின்பற்றிய நாடக சக்கரவர்த்தி நவாப் T.S. ராஜமாணிக்கம் பிள்ளை அவர்களின் “நந்தனார்” நாடகத்தை 1934 பிப்ரவரி 6 கோயமுத்தூரில் தேசப்பிதா அண்ணல் மகாத்மா காந்தியடிகள் நெடுநேரம் அமர்ந்து பார்த்து, பாராட்டி, பாராட்டு மடல் ஒன்றை வழங்கி சென்றார். அதில் இந்நாடகச் சபையின் நற்செயல்கள்  நாட்டிற்கு நன்மை பயப்பனவாக இருக்கும் என்று நம்புகிறேன் என்று குறிப்பிட்டு தமிழிலேயே “காந்தி” என்று கையொப்பமிட்டுள்ளார். இந்நிகழ்வு ஆவணப்படுத்தப்பட்டுள்ளது. இதன் மூலம் தமிழ் நாடகக் கலைக்கு நவாப் T.S ராஜமாணிக்கம் பிள்ளை அவர்களால் மகுடம் சூட்டப்பட்டது என்றால் அது மிகையாகாது. மேலும் அன்றைய நாடக வசூல் தொகையை மகாத்மா காந்தி தொடங்கிய ‘ஹரிஜன சேவா சங்கத்திற்கு’ நன்கொடையாக நவாப் T.S. ராஜமாணிக்கம் பிள்ளை அவர்களால் அண்ணல் மகாத்மா காந்தியிடம்  வழங்கப்பட்டது.  மகாத்மா காந்தி அவர்கள் நவாப் T.S.ராஜமாணிக்கம் பிள்ளைக்கு கையால் நூல்நூற்கும் “சர்க்கா” எனும் கயிறாட்டையை பரிசளித்தார். அதுமுதல் தாமும் தனது நாடக சபை மாணவர்களும் தினமும் நாடகப் பயிற்சியின் இடையே கயிறாட்டையால் நூல் நூற்று அந்நூலை திருப்பூர் நெசவாளைக்கு அனுப்பி துணிகளாகப் பெற்று அந்தக் கதர் ஆடைகளை மட்டுமே தாமணிந்து தமது மாணாக்களையும் அணியச் செய்து “சுதேசி இயக்கத்தில்” தன்னை ஐக்கியப் படுத்திக் கொண்டார்.   இலக்கிய பரிச்சியத்திற்கும் சலைத்தவரல்ல நவாப் T.S. ராஜமாணிக்கம் பிள்ளை,  இந்திய தேசியப் பாடலான ‘வந்தே மாதரம்’ பாடலை இயற்றிய பங்கிம் சந்தர் சட்டர்ஜியின் “துர்க்கேஷ் நந்தினி”  நாவலை தமிழில் மொழி பெயர்த்து “பிரேம குமாரி” என்ற பெயரில் நாடகத்தை நடத்தினார்.கோவை  திரு.C.A. அய்யாமுத்து அவர்களால் இயற்றப்பட்ட “இன்பசாகரன்” என்னும் தேசிய நாடகத்தை  நவாப் T.S. ராஜமாணிக்கம்  பிள்ளை அவர்கள் வெற்றிகரமாக நடத்தினார். இவரது குழுவினர்களைக் கொண்டு, மோஷன் பிக்ஷ்ர்ஸ் கம்பைன்ஸ்(மெர்ரி லேண்ட் ஸ்டுடியோ) நிறுவனர் திருவனந்தபுரம் முன்னாள் மேயர் திருவாளர் P. சுப்பிரமணியம் பிள்ளை அவர்கள்  தமிழில் “இன்பசாகரன்” என்றும் ஹிந்தியில் “பிரேம் சாகர்” என்ற பெயரிலும் 1939 ல்  திரைப் படமாக்கப்பட்டது. திரைப்படம் முழுவதும் படமாக்கப்பட்டு முடிந்து வெளியிட தயாராக இருந்த நிலையில் துரதிஷ்டவசமாக இப்படத்தின் தமிழ் திரைபடச்சுருள் முழுவதும் ஸ்டூடியோவில் ஏற்பட்ட பெரும் தீ விபத்தில் முற்றிலும் எரிந்து போனது. பாடல் ஒலிநாடா மட்டுமே கிடைக்கப்பெற்றது.

 மேலும் ரவீந்திரநாத் தாகூரின் “ராஜா ஓ ராணி” நாவலை “ஜோதி மன்னன்” எனும் பெயரில் தமிழில் நாடகமாக மேடையேற்றினார். இந்நாடகத்தின் சிறப்பம்சம் என்னவென்றால் கதாநாயகன் உருவம் இல்லாமல் அருவமாக உள்ளவனாதலால் இக்கதையை நாடகமாக்குவதென்பது மிகவும் சவாலான ஒன்றானது, தன் மதிநுட்பத்தால் இக்கதையை நாடகமாக்கி அதில் வெற்றியும் கண்டார்.  இவ்வெற்றிக்கு பரிசாக 1964 ஆம் ஆண்டு, சிறந்த நாடக இயக்குனருக்கான  தேசிய விருதான “சங்கீத் நாடக அகாடமி புரஸ்கார்” விருது இந்திய ஜனாதிபதி அவர்களால் வழங்கப்பட்டது.